Bienvenios a Asturias 2008
Nel añu 2008 celébrense n'Asturies una serie de conmemoraciones centenaries. Son fechos d'una trescendencia indiscutible pa la historia d'Asturies y, sobre too, elementos decisivos na construcción de la nuestra identidá colectiva.
Porque en 2008 celebramos los 1.200 años de la donación de la Cruz de los Ánxeles, que diba acabar convirtiéndose en símbolu de la capital d'Asturies, a la catedral de San Salvador; los 1.100 años de la donación, tamién a la catedral ovetense, de la Cruz de la Victoria, erixida n'emblema d'Asturies y presente nos escudos de bien de conceyos asturianos.
Celebramos, amás, los 400 años del empiezu de l'actividá docente na Universidá d'Uviú y los 200 años de l'asunción de poderes y la declaración de guerra a la Francia napoleónica por parte de la Xunta Xeneral del Principáu.
Y tamién, ente otros, celebramos el I Centenariu del descubrimientu del arte rupestre de les cueves d'El Pindal y la Loja y los 40 años del descubrimientu del arte rupestre de la cueva de Tito Bustillo.
Les principales instituciones asturianes implicaes –“Gobiernu del Principáu d'Asturies, Xunta Xeneral del Principáu d'Asturies, Arzobispáu d'Uviú, Universidá d'Uviú y Ayuntamientu d'Uviú–“ soscribieron en xunu de 2006 un conveniu de collaboración mutua pal desendolcu conxuntu de les actividaes conmemoratives de los acontecimientos. Como resultáu del trabayu de toles instituciones resultó un programa d'actividaes y un calendariu común qu'ufiertamos a los ciudadanos y ciudadanes.
Logotipos de los organizadores